وہی خدا ہے کہ جو افلاک سے اترتا نہیں Pas-e-shafaq mujhey khoon-e-jigar nazar ayey

پسِ شفق مُجھے خُونِ جگر نظر آئے
غروُب ہوتا ہوُا اِک بشر نظر آئے

مَیں کس زباں سے گہر کو گہر کہوں، کہ مجھے
صدف صدف میں ہجومِ شرر نظر آئے

مَیں جب بھی عالمِ حیرت میں آئینہ دیکھوں
ہزار نیزوں پہ اپنا ہی سر نظر آئے

عجیب پیشہ روی کے عجیب تر معیار
جو سنگ زن ہے وہ آئینہ گر نظر آئے

زمیں سے پیچھے کہیں رہ گئے میرے دیہات
وہاں تو آج بھی دورِ حجر نظر آئے

جو سطح پر ہی رہا، فاضلِ اجل ٹھہرا
جو تہہ میں ڈُوب گیا، بے خبر نظر آئے

وہی خدا، کہ جو افلاک سے اُترتا نہیں
اُسی کا عکس مجھے خاک پر نظر آئے

بُرا نہ مانے اگر محتسب، تو عرض کروں
مجھے گلوں میں فرشتوں کے گھر نظر آئے

مَیں جب بھی فکر کے پرتول کر روانہ ہوُا
فلک کے گنبدِ بے در میں در نظر آئے

کبھی تو پونچھ کے آنسو بھی، دیکھ دُنیا تو
کہ چشمِ تر سے تو بس چشمِ تر نظر آئے

میرے نصیب میں چھاؤں اگر نہیں، نہ سہی
کڑکتی دُھوپ میں دُور اِک شجر نظر آئے

ندیم میری رجا لا علاج ہے شاید
کہ دِل جلے تو طلوعِ سحر نظر آئے